Liebe Emanuel, liebevoll au Chnorzli gnannt vo mir
Danke für die 2 Johr wo mir hend dörfe zämä verbringe. Es bricht mir s Herz jetzt müese uf dere Siite no es paar Wort a Dich zrichte. Mir hend so viel erlebt, hend kochet (und das chan ich jetzt erscht so richtig sit ich i dinere Chochschuel gsi bin) sind go füürle im Wald, es het nid eifach es chlises Fürli dörfe sie, nanei, riiisig hets müese si schön vo gross zu chli gschichtet, sind viel a de Flüss oder See unterwegs gsi (immer mit ganz viel Cherzli und Luftballön für d Bella mis Hündli im Gepäck und natürli het au öppis feins z Zässä nöd dörfe fehle). Vo de Spaziergäng hemmer au immer us Naturchuchi öppis mitbrocht woni mengmol scho chli Schiss gha han, was mir do alles esset, aber du als Outdoorguide hesch das im Griff gha was me do alles chan verarbeite. Viel Ziet hesch mit Gott verbracht, hesch ihm dini Sorge dargleit und immer isern kämpft, hesch au immer wieder neue Lektüre gfunde und dir neui Wisheite ageignet zum wietercho. bi Dir dähei hend immer sicher 99 Cherzli brennt und es isch schöni Musig glaufe. Du hesch gliebt mit dine Nervguns zspiele, oder denn mit Pfilboge und Wurfaxt dusse umezdüse (iaaahhh), sowieso hesch du nur jedes erdenkliche Equipment gha dähei zum öppis erlebe. Mir sind am Schluss vo üsere Beziehig no zämä go Goldwäsche, was würklich es bsundrigs Erlebnis gsi isch. Ich danke Dir für die schöni und ufregendi Ziet, gspickt mit viele Brief und Ufmerksamkeite, Höchs und Tüfs, lange Gspröch und es immer wieder zämäfinde, du bisch en wunderbare Mensch gsi und hesch immer alli andere welle Rettä. ich bin sicher das isch Dir glunge, du hesch i so vielne Herze en grosse Fuessabdruck hinderlo. Ich werde Dich für immer i dere farbige Erinnerig phalte wie du als de Herzens-Chrieger gsi bisch. Danke für Alles
- Michaela