Mir hend e ganz e schöni inneri Verbindig zu enand. Euse Ustuusch isch immer herzlich und ehrlich gsi. Ich ha no es unglesenes SMS vo dir ufem Handy gha… mer hend eus vor Kurzem per Telefon unterhalte und welle öppis konkret abmache. Ich ha dir Muet zuegsproche und dir probiert e chli erkläre, warums e so crazy isch, wiäs halt isch und dass es trotzdem “guet” oder wertvoll isch, au wenns usefordernd isch… dini Frag (wozue isch das so, was isch denn de Sinn dehinter) han ich dir gseit: Damit s Lebe spannend isch, mues es so sii.
Ich wünschti, ich hetti dir nomal en “Lupf”, e chli Schub und Motiovation chöne geh, damit du nomal es paar Rundene dure hebsch, währends streng isch, und im Ahschluss dörfsch s Lebe wieder richtig gnüsse und gstärkt us de Lebenslektione use cho und dis Potential entfalte. Ich weiss, mini Wort hend dir gholfe, ich weiss, du bisch dankbar, au wenns nöd glanget het, dich zum wiitermache z motiviere.
Dini Entscheidig isch di richtig, nur du kennsch de Weg, wo du gahsch, für dich dörfs stimme, wiä du entscheidsch, das isch min tüüfschte Respekt a dich und ich akzeptier eis vo de höchschte Guet: de frei Wille. Es isch dis Lebe, dis Gschenk und ich chan säge, du hesch meeega viel drus gmacht, au wenn du e schiinbari Abkürzig gnoh hesch, aber genau denn wenns Lebe fertig isch, isch es fertig, das bestimme nöd ich und nöd min Wille söll gscheh.
Niemer chan dir din Weg abneh, oder wüsse, wos für dich söll dure gah. Mir alli sind eifach Begleiter vo dim Weg gsi, und mir sind immerno mit dir verbunde, au wenn du din letzte Schritt elei gange bisch.
Du hesch jetzt din Friede, dini Rueh, jetzt bisch du det, wos kei Frage meh brucht, well du jetzt verbunde bisch mit allem wo isch und das au erlebsch. Ich akzeptiere dich als en Teil vo mir und bin dankbar, en Teil vo dir dörfe z sii, dass mir beidi en Teil vo eusne Lebe hend chöne befülle, dass mir euses eigene Wese hend dörfe besser kenne lerne im Ustuusch, durch eui tüüfe und beriichernde Gspröch hend mir enand chöne Perspektive öffne und eifach mitenand da sii und Gmeinschaft ha, ohni Urteil und ohni Bedingige, das hend mir beidi verstande. Ganz vieli Lebenslektione hend mir zäme chöne bespreche und teile, eus beschenke mit Ihsichte und Weisheite.
Mir erkenned eus als es Spiegelbild vo enand, das mir en Teil vom Andere sind und das bliibt so. Danke Manolo für euses teile vo allem, vo so viel Liebi, Freud, Leid, Lache, wild tue, so schön wiä du d Natur hesch dörfe erlebe i dinere Lebensziit… du bisch sehr naturverbunde gsi, das gönn ich dir so fescht. Du hesch i dim Lebe viel meh erlebt, als vieli, wo ganz alt werdet, du hesch meh geh, als vieli wo riich sind je chönnted geh, du hesch meh dörfe gschenkt becho, als es Geburtstagschind sich chan wünsche. Ich glaube dra, dass es für dich stimmt und so sölls für mich sii, ich lass dich gah und weiss, dass du trotzdem nie ganz weg bisch 😉 Ich liebe dich vo Herze und umarm dich gaaanz fescht, min Brüeder, gnüss din Friede, wo ich mit dir dörf teile. Wenn ich a dich denke, han ich Freud im Herz, au wenn ich dich no e Ziit lang vermisse. Und ich verurteil dich für nüt, ich nimme dich ah in Liebi, so wiä mir eus scho immer ahgnoh hend, da dra ändert sich nie öppis. Mir gsehnd eus! 😉
Joel Daniel Peyer
- Joel